I am the it girl

Jæja, hérna kemur hitt bloggið sem ég talaði um. Þetta eru semsagt nokkur markverð atriði sem gerst hafa í mínu lífi það sem af er árinu 2006.

1. Ég mætti í skólann 2. janúar. Misreiknaði mig svo illilega að ég mætti þegar síðasti verkefnatíminn var að klárast en ekki byrja. Fór semsagt ekkert í skólann þann daginn.

2. Á fimmtudeginum í fyrstu skólavikunni ákvað ég að skella mér á kaffihúsið. Þar reyndu við mig hvorki meira né minna en 3 strákar! (persónulegt met) 2 aðrir spurðu mig hjá hverjum ég væri í heimsókn, þeir voru ekki að trúa því að ég væri á 2 ári í lögfræðideildinni.

3. Nr. 2 fyllti mælinn, ég hætti í skólanum (reyndar var það nú aðalega vegna þess að mér finnst lögfræði frekar leiðinleg..) Ég sumsé pakkaði saman fötunum mínum og brunaði í bæinn.

4. Ég bankaði uppá hjá Sunnu og bað um að fá samastað. Ég fékk rúmpláss og lykil. Fékk meira að segja líka eigin fatahrúgu á gólfinu! Hún er staðsett milli gosmynjasafnsins, bókahillunnar og hreinu-fatahrúgunnar hennar Sunnu.

5. Í bænum hef ég gert margt. Dagskráin hefur verið eftirfarandi: Kringlan, Smáralindin, Kringlan, Smáralindin, Kringlan, Smáralindin, Aktu taktu, Smáralindin, Bíó, Kringlan, Sækja um vinnu, Bíó, Smáralindin, hitta áhugvert fólk, Kringlan, Skeifan, Smáralindin, Sækja um vinnu, Kringlan...

6. Annað sem við Sunna höfum gert er að horfa á sjónvarpið, borða nammi og spila kapal í tölvunni. Kapallinn sem er inn í dag er Spider Solitaire, ég er meira að segja farin að spreyta mig í erfiðustu útgáfunni, ég hef enn ekki unnið hana.

7. Ég áreitti Sunnu kynferðislega í svefni eina nóttina. Vaknaði við það að ég var að strjúka á henni handlegginn, var snögg að kippa að mér hendinni og snúa mér á hina hliðina. Sunnu fannst þetta sem betur fer fyndið. (Hvað mig var að dreyma á meðan þessu stóð er önnur saga.. Sunna var EKKI í draumnum). Nóttina eftir þetta sagði ég við Sunnu uppúr svefni: “Get out of here” og svo nóttina eftir það þá bætti ég við “í guðana bænum!”. Ekki amarlegt að sofa við hliðina á mér!

8. Sunna þarf ekki að hafa áhyggjur af áreiti og næturtali mikið lengur. Ég er búin að fá herbergi í Árbænum. Fínasta kjallaraherbergi með aðstöðu hjá Ómari og Siggu sem eru að fara að leigja íbúð á 1. hæðinni.

9. Um daginn frétti ég það að ég væri í Listaháskóla Íslands, ekki fylgdi sögunni hvað ég væri að læra.

10. Ég er búin að fá vinnu. Reyndar er ég samtals búin að fá 3 vinnur. Fyrst fékk ég vinnu á Skógarbæ sem er elliheimili, ég gekk þaðan út með kvíðahnút í maganum og hugsaði með mér hvað ég væri eiginlega búin að koma mér í! Sem betur fer fékk ég svo vinnu hjá Elko. Átti að byrja þar á mánudag en fór í atvinnuviðtal hjá SPRON á mánudagsmorguninn. Fékk vinnu hjá þeim og er núna gjaldkeri í Álfabakka næstu 4-6 vikurnar og svo er óráðið með rest.

Fleira var það ekki í bili...

Jæja, hérna kemur þetta.. glugginn hafði ekki lokast heldur horfið og byrtist svo aftur!! undarlegt..

Ég var víst einhverntíma búin að lofa að setja hér inn aðra endurminningu. Þessi er mun nýrri en sú síðasta og misskilningurinn mun vandræðalegri. En hefst nú sagan.

Þetta hófst allt árið 1998. Fyrir þá sem ekki eru sleipir í reikningi þá var ég 14 ára það ár (úff langt síðan!). Og fyrir þá sem ekki muna hvað gerðist merkilegt árið 1998 þá bar það helst að Hvalfjarðagöngin frægu voru opnuð fyrir umferð. Ég man nú ekki hvenær ég fór mína fyrstu ferð í gegnum göngin, en það var á meðan það var ennþá ókeypis í gegnum þau (semsagt fyrsta mánuðinn eða svo). Ég var á suðurleið með Óla granna og Vallý og mér fannst þetta alveg stórmerkilegt, enda var ég búin að bíða spennt eftir þessu í mörg ár, eða allt frá því að ég heyrði fyrst talað um áform þess efnis að gera göng í fréttunum þegar ég var einhverntíma í heimsókn hjá pabba nokkrum árum fyrr.

En já aftur að sögunni. Ég semsagt fór þarna í gegn og eins og svo oft áður horfði ég í kringum mig og spáði og spekúleraði í hlutunum. Ég held nú samt að það hafi ekki vakið athygli mína í þessari fyrstu ferð, en fljótlega tók ég eftir umferðarskilti sem var á fleiri en einum og fleiri en tveimur stöðum í göngunum. Þetta skilti er á bláum grunni, með mynd sem er í rauðum og hvítum lit. Eftir að hafa horft á þetta merki þjóta framhjá oft og mörgum sinnum fór ég að velta því fyrir mér hvað í andskotanum maður ætti að lesa út úr því. Það eina sem ég gat séð var hesthaus og þar sem mér fannst það ekki mjög líklegt þá fór ég að stara á þetta merki í hvert skipti sem ég keyrði í gegn. Að sjálfsögðu spurði ég ekki heldur velti þessu bara fyrir mér! Eftir nokkrar ferðir og miklar vangaveltur komst ég að þeirri niðurstöðu að þetta væri sennilega kall sem héldi á vasaljósi svona fyrir ofan höfuðið á sér og væri að lýsa sér leið. Mér fannst þetta ágætis útskýring, gerði ráð fyrir að það væri semsagt hægt að nálgast vasaljós þar sem þessi skilti eru. Ég var sátt með þessa útskýringu í 1 eða 2 ár og það var ekki fyrr en ég rakst á vasadagbók með yfirliti yfir umferðarmerki að ég ákvað að skoða þetta betur. Ég fann merkið undir liðnum þjónustumerki og varð mér þá ljóst að ekki var um kall með vasaljós að ræða. Merkið sem um ræðir lýtur svona út:


Þetta er semsagt merki sem segir manni það að þarna er hægt að nálgast slökkvitæki, það hefur hvorki með hesta né vasaljós að gera! Það sem ég hef mér til málsbóta er að ég er hálfblind og það er ekki auðvelt að sjá svona lagað þegar maður þýtur framhjá á 80km hraða!!

Þannig var nú það!

Hrafnhildur, ljóska á tímabilum!

Staður: Loðmundarfjörður
Stund: o6.o7.2005

Jahérna hér! Ég held að mér sé ekki ætlað að blogga!! Ég semsagt skrifaði heillangt blogg í gær og æ æ, netið fraus þannig að allt datt út!! ok, ég blótaði því bara smá og endurskrifaði bloggið. Það datt ekki út en ég var ekki að koma því á netið vegna þess að ég komst ekki inn á þessa blessuðu blogger.com síðu! Og núna þegar ég er í góðu netsambandi á Bifröst er bloggfærslan föst í tölvunni minni í Reykjavík, frábært! En þetta er nú ekki allt, ég ákvað, fyrst að blóggið síðan í gær er í gíslingu í Reykjavík, að skrifa bara annað blogg! Semsagt bráðskemmtilega sögu, ég var að verða komin vel á veg með hana og þá tókst mér AÐ LOKA glugganum!!! og að sjálfsögðu datt allt út!! aaarrrrggg! Spurning um að fara að skrifa þetta bara í word og ýta á save á svona 5 sek fresti! En já.. bloggin koma bæði, fljótlega..

Yfir og út

Við Sunna höfum ákveðið að stofna rapp-dúet. Er komið nafn á dúettið og mun það heita Piff Mamas, við erum sannfærðar um að fyrst Puff daddy komst áfram þá hljóta Piff Mamas að verða miklu frægari! ;) Okkur vantar umboðsmann ef einhver hefur áhuga.

Settu nafnið þitt í kommentakerfið og..

1. Ég segi þér eitthvað handahófskennt um þig.

2. Ég segi þér hvaða lag/mynd minnir mig á þig.

3. Ég segi þér hvaða bragð minnir mig á þig.

4. Ég segi þér fyrstu ljósu minninguna mína af þér.

5. Ég segi þér á hvaða dýr þú minnir mig á.

6. Ég spyr þig að einhverju sem ég hef velt lengi fyrir mér um þig.

7. Ef þú lest þetta verðuru að setja þetta á bloggið þitt!

Staður: Akureyri
Stund: 31. des. 2005